Bir neçə gün öncə dövlət sərhədlərimizi pozmağa cəhd göstərmiş Ermənistan Silahlı Qüvvələrinin qarşısını alarkən şəhid olmuş kiçik çavuş Abbaszadə Elşad Raquf oğlunun, əsgər Hacıyev Qəfərəli İntiqam oğlunun ölümündən sonra layiq görüldükləri “Hərbi xidmətdə fərqlənməyə görə” 3-cü dərəcəli medallar doğulduqları Tərtər Rayonun Kəngərli və Yevlax rayonunun Qaraoğlan kəndlərində təntənəli şəkildə ailərinə təqdim edildi.
Müdafiə Nazirliyinin rəsmisi polkovnik Abdulla Qurbani şəhidlərin ailələrinə Müdafiə Naziri general-polkovnik Zakir Həsənovun baş sağlığını çatdırdı və onları əmin etdi ki, şəhidlərin qisası alınır və bundan sonra da alınacaq.
Hər iki şəhidin valideynləri Yevlax və Tərtər İcra Hakimiyyəti nümayəndələri, Qarabağ müharibəsi veteranları göstərilən diqqət və qayğıya görə Azərbaycan Respublikasının Prezidenti cənab İlham Əliyevə və Müdafiə Nazirliyinin rəhbərliyinə minnətdarlıq bildirərək, hər an Ali Baş Komandanın döyüş əmrlərinə hazır olduqlarını bəyan etdilər.